(जाति : समुदितमदना)
आम्रतरू हा धरी शिरावर प्रेमळ निज साउली,मृदुल, कोंवळी, श्यामल हिरवळ पसरे पायांतळी
आणिक पुढतीं झरा खळाळत खडकांतुन चालला,
साध्या, भोळ्या गीतामध्यें अपुल्या नित रंगला !
कांठी त्याच्या निळीं लव्हाळीं, डुलती त्यांचे तुरे,
तृणांकुरांवर इवलालीं हीं उडतीं फुलपांखरें !
खडा पहारा करिती भंवतीं निळेभुरे डोंगर,
अगाध सुंदर भव्य शोभतें माथ्यावर अंबर !
दुर्मिळ ऐशी देइ शांतता सदा मला हें स्थल,
ऎकुं न येई इथें जगाचा कर्कश कोलाहल.
व्याप जगाचा विसराया मी येइ इथें सत्वर,
अर्धोन्मीलित नयनीं बघतें स्वप्नें अतिसुंदर.
शांतविलें मी तप्त जिवाला इथें कितीदां तरी;
कितीदां यावें तरी येथली अवीट ही माधुरी !
— शांता ज. शेळके
9 comments:
सुंदर कविता, लहानपणी माझी बहिण ही कविता पाठ म्हणायची ,मामा कडे Nationalpanasonic चा टेपरेकॉर्डर आणला होता त्यामध्ये तिच्या आवाजात टेप केले होते. काळाच्या ओघात टेपरेकॉर्डर पडद्याआड गेले, ती कविता आज सहज वाटले गूगल वर type करून बघावे म्हटले, आणि मिळाली सुद्धा, जुन्या सगळ्या आठवणी जाग्या झाल्या
I was searching for this poem for long. I could memorize two stanzas. Here I got it full. Happy to find it here. Thanks to this blog to take me to olden days.
This poem was for study in 3rd class in balbharti...very nice poem which i have search
Mala he Kavita 1984 Sali me 4th madhe hoto teva Hoti. Mazhi sarvat avadati Kavita hoti. Mazhya aai ni mazhya kadun path karun ghetli hoti. Aai Nahi rahili. Pun aai chi khup athvan zhali. He Kavita khup shodhat hoto. Aaj ti sapadli. Lahan pun dolya samor ala sagla. Balpanicha kal sukhacha.
लहनपनाची आठवण जागी झाली
मी ही कविता वर्ग री मध्ये शिकलो होतो. मला आवडणाऱ्या कवितांपैकी ही एक आहे. लहानपणची आठवण ताजी झाली. धन्यवाद गुगल
चौथी मध्ये होती कविता.
मला ४थ्या वर्गात ही कविता बालभारती मध्ये अभ्यासायला होती.माझी खूप खूप आवडती कविता होती आणि अजूनही ही कविता माझी प्रचंड आवडती कविता आहे.तेंव्हा ती तोंडपाठ होती.पण आता पूर्ण आठवत नव्हती.आज सहजच गुगल वर शोधली आणि मला पूर्ण कविता मिळाली.मला फार फार आनंद वाटला.खूप आठवणी मनात गोळा झाल्या. कवियत्री शांता शेळके माझ्या खूप आवडत्या कवियत्री आहेत.खूप समाधान वाटले.आणि यासाठी गुगल आणि या ब्लॉग चे खूप खूप आभार.
War chya 2 line mazya path hotya , lahanpanapasun mi he visaru shakalo nahi , khup aathawate te diwas ....
Post a Comment