चंदन

माझ्या चंदनी खोडाचा
मंत्र: 'झिजणे झिजणे !'
ऊणें लिंपायाला माझें
घाली सुगंधाचे लेणें

झिज केशरी तयाची
तप्त जीवा लावी उटी
आंत उमले भावना
शांत, शीतल, गोरटी !

माझें सुख, माझी तृप्ति
हीच देवपूजा त्याची—
निष्काम ते; अपवाद :
इच्छा एक झिजायाची !

झिजतें तें—जीव माझा
होतो आंत आंत गोळा
अडखळे हात आणि
पाणी तरारतें डोळां—

वृद्ध चंदन तें माझें
नित्य जपलें—जपेन
त्याच्यासाठीं—आण त्याची—
जीव ठेवीन गहाण !



— कृष्ण बलवंत निकुंब

तृणबाळे होवू

तृणबाळे होऊ, क्षणभर, तृणबाळे होऊ;
गड्यांनो, तृणबाळे होवू.

पैजण घालुन नाचत मुरडत
निर्झर येइल ठुमकत ठुमकत,
हसुन करूया त्याचे स्वागत,
तुषारात न्हाऊ, क्षणभर, तुषारात न्हाऊ
गड्यांनी, तुणबाळे होवू,

चपल वारुवर आरुढ होउन
उटी फुलांची अंगी लावुन
अवखळ वारा येइल धावुन,
डुलत डुलत राहू, क्षणभर डुलत डुलत राहू;
गड्यांनो तृणबाळे होवू

निळे जांभळे लेउन मंदील
रानफुलांचे थवे शोभतिल
गोड गोड गुजगोष्टी करतील
त्या ऐकत राहू, क्षणभर, कान हळुच देवू ;
गड्यांनो तृणबाळे होवू

लांब सावल्या पडता, गगनी
रंग नाचतिल फेर धरोनी,
सोन्याची मग होईल धरणी,
टक लावुन पाहू, क्षणभर, टक लावुन पाहू;
गड्यांनो तृणबाळे होवू

आणि कधिमधि सायंकाळी
येतिल फिरण्या बालमंडळी
हळु पायाला करुनी गुदगुली
गमतीने हसवू, क्षणभर, गमतीने हसवू;
गड्यांनो तृणबाळे होवू


 – कृष्ण बळवंत निकुंब

Compiled by : Abhay Bapat on Facebook

घाल घाल पिंगा वाऱ्या

घाल घाल पिंगा वाऱ्या, माझ्या परसात
माहेरी जा, सुवासाची कर बरसात !

"सुखी आहे पोर" सांग आईच्या कानात—
आई, भाऊसाठी परी मन खंतावतं !

विसरली का ग ? –भादव्यात वर्स झालं,
माहेरीच्या सुखाला ग, मन आचवलं.

फिरुन-फिरुन सय येई, जीव वेडावतो
चंद्रकळेचा ग, शेव, ओलाचिंब होतो !

काळ्या कपिलेची नंदा खोडकर फार,
हुंगहुंगुनीया करी कशी ग, बेजार !

परसात पारिजातकाचा सडा पडे,
कधी फुलं वेचायला नेशील तू गडे ?

कपिलेच्या दुधावर मऊ दाट साय
माया माझ्यावर दाट जशी तुझी, माय ... !"

आले भरून डोळे पुन्हा गळा नि दाटला
माऊलीच्या भेटीसाठी जीव व्याकुळला !


— कृ. ब. निकुंब

गाणे ऐकण्यासाठी खालील लिंकवर क्लिक करा.
घाल घाल पिंगा वार्‍या