मी ताक पितो, मी ताक पिणार !
मला दूध नको, मला लोणी नको
दही नको, आणखी काही नको
मी ताक पितो, मी ताक पिणार !
आजचे दूध हे उद्याचे दही आहे
उद्याचे दही हे परवाचे लोणी आहे
परवाचे लोणी हे तेरवाचे तूप आहे
परंतु ताक हे माझे ताक आहे
अनंत काळाचे ताक आहे
ताकात शक्राची भाक आहे
अनंताची हाक आहे
दिव्यत्वाची झाक आहे
गेले जरी ताजेपण
ताक हे ताक राहील
अन् शिळे झाले तरी
शिळ्या कढीला ऊत येईल !
मी ताक पितो, मी ताक पिणार !
हा माझा भारत देश आहे
इकडे ब्रह्मदेश आहे
तिकडे अफगाणिस्तान आहे
बलुचिस्तान आहे, पाकिस्तान आहे
पोटात माझ्या ताकिस्तान आहे
ताक हे पाक आहे
सर्व पेयांतील नाक आहे
मी नाकानेच ताक पिणार
मी ताक पितो, मी ताक पिणार !
प्रतिभा माझी ताक घुसळते आहे
डेऱ्यामधे ताक उसळते आहे
ताकात रवी बुडते आहे
बुडून बडबड करते आहे
तोऱ्यात हासते आहे
फेऱ्यात नाचते आहे
डेऱ्यात शून्याचे संशोधन करते आहे
काय तुम्ही पाहिली ताकाची चवी ?
' जे न देखे कवी, ते देखे रवी '
अशी माझी रवी, अशी माझी रवी
मी ताक पितो, मी ताक पिणार !
ताकात काय नाही ?
ताकात सर्व आहे
सर्व आहे, निखर्व आहे
पाहिले का कधी ताकाचे घुसळण ?
घुसळणारी पाहिली का कधी गवळण ?
घुसळ घू घुसळ घू
नादामधे चूर आहे
ताक् घुर्र ताक् घुर्र
ताकात तिच्या सूर आहे
' घुटुर घू घुटुर घू '
कबुतरी बोल आहे
ताक् धिन् ताक् धिन्
ताकात तिच्या ताल आहे
गीत आहे, संगीत आहे
भावना आहे, भाव आहे
अन् बुद्धीचे तर 'ताकाखाव' आहे
मी ताक पितो, मी ताक पिणार !
ताकातील जीवनसत्वे मानवच जाणे
म्हशीच्या रेडकाला त्याचे काय !
ताक दिले तरी व्हॅय
दूध दिले तरी व्हॅय
एकच अभिप्राय !
ताक हे पारखून घ्यावे
ताक हे फुरकून प्यावे !
मी ताक पितो, मी ताक पिणार !
नव्या युगाचा पाईक मी कट्टा आहे
नाविन्याचा गठ्ठा आहे
काय तुम्हां वाटते थट्टा आहे ?
अरे, ताकाचा मी मठ्ठा आहे
उत्साह-उन्नती-आरोग्याचे
ताकत्व झाले आहे
ताकत्वतापण ताकात माझ्या आले आहे
युगायुगांचे आले आहे
मी ताक पितो, मी ताक पिणार !
मनातले मांडे छपविणार नाही
ताकाचे भांडे लपविणार नाही
ताक प्यायला कचणार नाही
ताकापुरते रामायण वाचणार नाही
ताक माझा जीव कि प्राण !
ताक देते तीच ताकद होते
अश्मयुगातील चष्मा लावुन
पश्मीन्याची शाल पांघरून
आस्मादिक हा —
युगायुगांना उगाळीत
शतशतकांचे फत्कल मारुन
बसलो येथे ताक पीत
मी ' तक्रानंद सरस्वती ' आहे
मी ताक पितो, मी ताक पिणार !
– सोपानदेव चौधरी
मला दूध नको, मला लोणी नको
दही नको, आणखी काही नको
मी ताक पितो, मी ताक पिणार !
आजचे दूध हे उद्याचे दही आहे
उद्याचे दही हे परवाचे लोणी आहे
परवाचे लोणी हे तेरवाचे तूप आहे
परंतु ताक हे माझे ताक आहे
अनंत काळाचे ताक आहे
ताकात शक्राची भाक आहे
अनंताची हाक आहे
दिव्यत्वाची झाक आहे
गेले जरी ताजेपण
ताक हे ताक राहील
अन् शिळे झाले तरी
शिळ्या कढीला ऊत येईल !
मी ताक पितो, मी ताक पिणार !
हा माझा भारत देश आहे
इकडे ब्रह्मदेश आहे
तिकडे अफगाणिस्तान आहे
बलुचिस्तान आहे, पाकिस्तान आहे
पोटात माझ्या ताकिस्तान आहे
ताक हे पाक आहे
सर्व पेयांतील नाक आहे
मी नाकानेच ताक पिणार
मी ताक पितो, मी ताक पिणार !
प्रतिभा माझी ताक घुसळते आहे
डेऱ्यामधे ताक उसळते आहे
ताकात रवी बुडते आहे
बुडून बडबड करते आहे
तोऱ्यात हासते आहे
फेऱ्यात नाचते आहे
डेऱ्यात शून्याचे संशोधन करते आहे
काय तुम्ही पाहिली ताकाची चवी ?
' जे न देखे कवी, ते देखे रवी '
अशी माझी रवी, अशी माझी रवी
मी ताक पितो, मी ताक पिणार !
ताकात काय नाही ?
ताकात सर्व आहे
सर्व आहे, निखर्व आहे
पाहिले का कधी ताकाचे घुसळण ?
घुसळणारी पाहिली का कधी गवळण ?
घुसळ घू घुसळ घू
नादामधे चूर आहे
ताक् घुर्र ताक् घुर्र
ताकात तिच्या सूर आहे
' घुटुर घू घुटुर घू '
कबुतरी बोल आहे
ताक् धिन् ताक् धिन्
ताकात तिच्या ताल आहे
गीत आहे, संगीत आहे
भावना आहे, भाव आहे
अन् बुद्धीचे तर 'ताकाखाव' आहे
मी ताक पितो, मी ताक पिणार !
ताकातील जीवनसत्वे मानवच जाणे
म्हशीच्या रेडकाला त्याचे काय !
ताक दिले तरी व्हॅय
दूध दिले तरी व्हॅय
एकच अभिप्राय !
ताक हे पारखून घ्यावे
ताक हे फुरकून प्यावे !
मी ताक पितो, मी ताक पिणार !
नव्या युगाचा पाईक मी कट्टा आहे
नाविन्याचा गठ्ठा आहे
काय तुम्हां वाटते थट्टा आहे ?
अरे, ताकाचा मी मठ्ठा आहे
उत्साह-उन्नती-आरोग्याचे
ताकत्व झाले आहे
ताकत्वतापण ताकात माझ्या आले आहे
युगायुगांचे आले आहे
मी ताक पितो, मी ताक पिणार !
मनातले मांडे छपविणार नाही
ताकाचे भांडे लपविणार नाही
ताक प्यायला कचणार नाही
ताकापुरते रामायण वाचणार नाही
ताक माझा जीव कि प्राण !
ताक देते तीच ताकद होते
अश्मयुगातील चष्मा लावुन
पश्मीन्याची शाल पांघरून
आस्मादिक हा —
युगायुगांना उगाळीत
शतशतकांचे फत्कल मारुन
बसलो येथे ताक पीत
मी ' तक्रानंद सरस्वती ' आहे
मी ताक पितो, मी ताक पिणार !
– सोपानदेव चौधरी
