जो बाळा जो

आकाश अंगणी रांगत आला
शीण तान्हुल्या भारीच झाला
पाळण्यामध्ये बाळ घातला
सृष्टी माऊली लागे गायाला... जो बाळा जो जो रे जो ||

बाई गं माझं बाळ गुणाच
रांगत होतं तरी केव्हाच
लाल दिसती डोळे झोपेचे
निज रे बाळा निज सुखाने... जो बाळा जो जो रे जो ||

निशामातेच्या अंकी निजाया
केव्हाच गेला दिवस राया
जागून जागून तापली काया
नीज रे बाळा, नीज राजसा... जो बाळा जो जो रे जो ||

आनंदकंदा जगतधारा
नीज सुखाने नीज वासरा
पहाट होता जाई माघारा
नीज रे बाळा, नीज भास्करा... जो बाळा जो जो रे जो ||



– 'दत्त' (दत्तात्रय कोंडो घाटे)

हे अंगाईगीत श्रीमान जागृत आणि श्रीमती संध्या व्यापारी यांच्या मदतीने पूर्ण झाले. संकलक श्री जागृत आणि श्रीमती संध्या व्यापारी यांचा आभारी आहे.