झिणिझिणि वाजे बीन

झिणिझिणि वाजे बीन
सख्या रे, अनुदिन चीज नवीन

कधी अर्थाविन सुखद तराणा
कधी मंत्रांचा भास दिवाणा
सूर सुना कधी केविलवाणा
शरणागत अतिलीन
सख्या रे, झिणिझिणि वाजे बीन

कधि खटका, कधि रुसवा लटका
छेडी कधी प्राणांतिक झटका
कधी जीवाचा तोडून लचका
घेते फिरत कठीण
सख्या रे, झिणिझिणि वाजे बीन

रोमांचातुन कधि दीपोत्सव
कधी नेत्रांतून पुष्पांचे स्रव
कधी प्राणांतून सागरतांडव
अमृतसिंचित जीण
सख्या रे, झिणिझिणि वाजे बीन

सौभाग्ये या सुरांत तारा
त्यातून अचपळ खेळे पारा
अलख निरंजन वाजविणारा
सहजपणात प्रवीण
सख्या रे, झिणिझिणि वाजे बीन


–  बा. भ. बोरकर