देह मंदिर चित्त मंदिर

देह मंदिर, चित्त मंदिर एक तेथे प्रार्थना ।
सत्य–सुंदर मंगलाची नित्य हो आराधना ॥

दु:खितांचे दु:ख जावो ही मनाची कामना
वेदना जाणावयाला जागवू संवेदना
दुर्बलांच्या रक्षणाला पौरुषाची साधना ॥

जीवनी नव तेज राहो, अंतरंगी भावना
सुंदराचा वेध लागो मानवाच्या जीवना
शौर्य लाभो, धैर्य लाभो, सत्यता संशोधना ॥

जाळुनी वैषम्य सारे वैर सार्‍या वासना
मानवाच्या एकतेची मूर्त होवो कल्पना
मुक्‍त आम्ही फक्‍त मानू बंधुतेच्या बंधना ॥


– वसंत बापट