दूर दूर माझे घर

दूर दूर माझे घर		जोगाईच्या पलीकडे !
पाठ राखती तयाची		डोंगराचे उंच कडे !
दूर दूर माझे घर		गर्द राईच्या पल्याड,
घुमतसे कानी माझ्या		राघू, कोकिळेची साद !
दूर दूर माझे घर		वाट आडवळणाची,
मधे जमलीसे गर्दी		किती ओहळ-नाल्यांची.
दूर दूर माझे घर		आजोबाने बांधलेले,
जरी जुनाट पडके,		गणगोत सांभाळले.
दूर दूर माझे घर		शेत इवले शेजारी,
पिकवितो बाप माझा		तिथे जोंधळा बाजरी.
दूर दूर माझे घर		घरी निजविते आई,
मज दळण दळता		गात गोडशी अंगाई.
दूर दूर माझे घर		घरी बहीण सानुली,
बोलाविते खेळायाला		तिजसंगे भातुकली.
दूर दूर माझे घर		घरी शेळी, गाय, बैल,
कधी रुसते, पेटते		तीन दगडांची चूल.
दूर दूर माझे घर		तिथे कधी सणावारी,
उडे धमाल गाण्यांची		नाचण्याची रातभरी !
दूर दूर माझे घर		उभे चांदीच्या रसात,
राखणीस रातकिडे		किरकिरती जोसात !

 

— ना. ध. पाटिल

संकल्पना : श्रीमती वनमाला पाटील, जालना