आजोळी

माझ्या मामाची रंगीत गाडी हो
तिला खिल्लार्‍या बैलांची जोडी हो !
कशी दौडत दौडत येई हो
मला आजोळी घेऊन जाई हो

नाही बिकट घाट,
सारी सपाट वाट,

मऊ गालीचे ठायीठायी हो !

शीळ घालून मंजूळवाणी हो
पाजी बैलांना ओहोळ पाणी हो
गळा खुळखूळ घुंगूरमाळा हो
गाई किलबील विहंगमेळा हो !

बाजरिच्या शेतात,
करी सळसळ वात,

कशी घुमवी आंबेराई हो !

कोण कानोसा घेऊन पाही हो
कोण लगबग धावून येई हो
गहिवरून धरून पोटी हो

माझे आजोबा चुंबन घेती हो

लेक एकूलती,
नातु एकूलता,

किती कौतुक कौतुक होई हो !



— ग. ह. पाटील